Adriana, Papy

Biography

Nomber ofishal di e artista ku a restaura e stashinan di nos Katedral ta Girigorio Afelio Adriana i ta konosi bou di e nomber Papy. Papy  a nase dia 17 di november 1956 na Korsou di e pareha Hector i Marina Adriana i nan tabata biba den e bario di Zuid Abrahams. Papy su tata a fayese na edat relativamente hoben. Papy mes tabata tin apenas 4 ana di edat e tempu ei i nan tabata 3 ruman i papy su mama tabata spera e di kuater yu. Bida pa pa e famia tabata hopi difisil.

Papy na edat hoben mester a bende number pa su mama por a kria nan 4. Despues Papy mester a bende pan sera i otro kos dushi kas pa kas den bario i tambe djasabra i dianan di fiesta den plasa. Durante ku Papy tabata pasa kas pa kas bende pan i otro kos dushi ela mira Sr. Roque Martina pinta riba murayanan di nan balkon di kas. Papy no tabata tin kuashi pa e pinta meskos ku Roque tabata tin. Papy a disidi ku e mes ta traha su kuashinan. Pa esaki Papy tabata huza lana di rabu di su kacho i foil di aluminio di bleki lechi. Papy no tabata por a kumpra kuashi.

Tempu ku Papy tabata na skol basiko, Papy a wordu skohe pa bai keda un temporada na Kinderoorden Brakkeput pa motibu ku Papy tabata hopi flaku. Na konderoorden Brakkeput Papy a bin sera konosi ku Zuster Mathea kende a rekonose e talentonan di Papy. Zuster Mathea, na su turno, a introdusi pinturanan di Papy na Sr. Rudy Plaate i Sr. Rudy Paate a paga un kurso serka Broeder Smetser pa Papy por sina pinta. Pa prome biaha Papy por a pinta ku kuashinan real i no lana di su kacho. Papy a sigui e kurso aki mas of menos 3 luna. Papy mester a stop despues pa motibu ku su Mama no tabata ke pa Papy ta riba kaya anochi.

Papy despues di tempu, apesar di su situashon difisil tempu e tabata hoben, a desaroya su mes i tin un titulo di “Master in Business Administration” MBA i a okupa hopi puestonan haltu den diferente bankonan lokal, komisariadonan i otro empresanan aki na Korsou.  Apesar di e okupashonan fulltime aki Papy tog a sigui desaroya su talentonan profeshonalmente den pintamentu riba su mes. Pues Papy ta kompletamente outo didaktiko. Awendia Papy ta dedika su mes kompletemente na Pintamentu i tin un akademia di arte den kual e ta traspasa su konosementu na nos hobennan..

  • Art Piece of Papy Adriana